மின்சாரம் தாக்கி வாலிபர் பலி உடலுடன் உறவினர்கள் சாலை மறியல்

நவம்பர் 12,2012,03:02 IST

ஏர்வாடி:ஏர்வாடியில் மின்சாரம் தாக்கி இறந்தவர் வழக்கில் சம்மந்தப்பட்டவர்கள் மீது வழக்கு பதிவு செய்யக்கோரி உறவினர்கள் உடலுடன் மறியல் செய்ததால் பெரும் பரபரப்பு ஏற்பட்டது. இதனால் போக்குவரத்து பாதிக்கப்பட்டது.ஏர்வாடி 9ம் தெருவை சேர்ந்தவர் நாகூர் மீரா சாகிப். ஏர்வாடி பஸ் ஸ்டாப் அருகே எஸ்டிடி., பூத் மற்றும் விழா காலங்களில் வெடிக்கடையும் நடத்தி வருகிறார். தீபாவளி பண்டிகைக்காக பட்டாசு விற்பனை செய்து வருகிறார். தற்போது அடிக்கடி ஏற்பட்டு வரும் மின்தடை காரணமாக கடைக்கு தனது கடைக்கு எதிரே உள்ள உறவினரான சலீம் என்பவரது கடையில் உள்ள இன்வெட்டரில் இருந்து மின்சாரம் கொண்டு வர முடிவு செய்தார்.அதற்காக மின்வயரை இழுப்பதற்காக ஏர்வாடி 3வது தெருவை சேர்ந்த சலாகுதில் மகன் பீர் (30) என்பவரை வேலைக்கு அழைத்துள்ளார்.

சலீம் கடையில் இருந்து, நாகூர் மீராசாகிப் கடைக்கு குறுக்கே உள்ள ரோட்டை கடப்பதற்காக வயரை உயரமாக இழுப்பதற்கு அருகிலுள்ள கொடிகம்பம் மீது பீர் ஏறியுள்ளார். அப்போது அருகே உள்ள உயரழுத்த மின்சார கம்பி மீது கொடிக்கம்பம் உரசியதில் மின்சாரம் தாக்கி பீர் சம்பவ இடத்திலேயே உடல் கருகி பறிதாபமாக இறந்தார்.இதுகுறித்து திருவரங்கநேரி வி.ஏ.ஓ.(பொறுப்பு) பாலன் அளித்த புகாரின் பேரில் ஏர்வாடி போலீசார் 174வது பிரிவின் கீழ் விபத்து என வழக்குப்பதிவு செய்து பீரின் உடலை கைப்பற்றி பிரேத பரிசோதனைக்காக பாளை. ஐகிரவுண்ட் ஆஸ்பத்திரிக்கு அனுப்பி வைத்தனர். ஆஸ்பத்திரியில் பிரேத பரிசோதனை முடிந்து உடலை மீண்டும் ஏர்வாடிக்கு கொண்டு வந்த அவரது உறவினர்கள் சம்பந்தப்பட்ட கடைக்காரர்கள் மீதும் போலீசார் வழக்கு பதிவு செய்யவேண்டும் என சாலை மறியலில் ஈடுபட்டனர். இதனால் அங்கு போக்குவரத்து பாதிக்கப்பட்டது. உடனே சம்பவ இடத்திற்கு நாங்குநேரி டிஎஸ்பி., கோவிந்தராஜ், ஏர்வாடி இன்ஸ்பெக்டர் மனோகர் மற்றும் போலீசார் மறியலில் ஈடுபட்டவர்களிடம் பேச்சுவார்த்தை நடத்தினர்.
சம்மந்தப்பட்ட கடைக்காரர்கள் நாகூர் மீராசாகிப், சலீம் ஆகியோர் மீதும் வழக்கு பதிவு செய்வதாக உறுதி அளித்தனர். அதன்பின் மறியலில் ஈடுபட்டவர்கள் உடலை எடுத்துக்கொண்டு அடக்கம் செய்ய புறப்பட்டு சென்றனர். இதனால் அப்பகுதியில் சிறிது நேரம் போக்குவரத்து பாதிக்கப்பட்டது. மின்சாரம் தாக்கி வாலிபர் இறந்த வழக்கில் தொடர்புடைய சம்பந்தப்பட்ட நாகூர் மீரா சாகிப் மற்றும் சலீம் ஆகியோரை போலீசார் தேடி வருகின்றனர்.

http://www.dinamalar.com/district_detail.asp?id=584562